Elis Juliana
Curaçao Cultural Icon

Atenshon!

Un grandi di Kòrsou i Antia a bai sosegá. Elis Juliana, konosí komo Òmpi Elis pa un gran mayoria di nos pueblo a fayesé mardugá di 23 di yüni na edat di 85 aña. Elis a sa di yuda nos pone paso na manera sistemátiko pa nos subi seru di sabiduria i di para pa loke nos ta. Un palabra di konsuelo pa su famia i pa henter pueblo di e islanan ku a yega di forma Antia hulandes. Resientemente el a risibí un doktorado honorífiko di Universidat di Kòrsou pa e gran trabou ku el a hasi riba diferente tereno ku tin keber ku identidat, literatura, antropologia, arkeologia, arte gráfiko, i arte plástiko.

Ta mi mes ta’ tur kos pareu: tambú i letra E pregunta kua persona lokal a influenshá di forma markante antropologia, arkeologia, dramatisashon, kontamentu di kuenta òf kualke otro un dje terenonan menshoná aki, lo generá sin duda ku konsenso general, Elis Juliana komo kontesta. E mes a hasi kla ku su arte ta basá riba inbestigashon i su inbestigashon a hasi uzo di arte pa difundí mensahenan. Na promé bista por parse ku arte i siensia ta bruá den otro. No ta bruá nan ta, ta konektá ku otro. Esaki ta un dje rasgonan distintivo fuerte di Juliana: integrashon. E integrashon akí e ta hasi a base di un konsiensia profundo di kiko mester konservá i propagá den herensia di Kòrsou. E no ta praktiká arte pa arte, sino arte pa konsientisá. Hasiendo esaki e ta konbertí den konservadó mayó dje herensia akí i ta pèrkurá pa kontinuidat. Ta esaki ta e kapa teóriko ku ta kubri e terenonan artístiko i sientífiko di Elis Juliana. Den deskripshon separá di nan, ta e 3 konstansianan menshoná, esta konsiensia, integrashon i kontinuidat ta notabel. Nan a hustifiká desaroyá un teoria propio relashoná ku Juliana su influensha: Julianismo. Terenonan di arte i inbestigashon Den e parti akí mi a hasi uzo di un ensayo ku mi a skirbi pa Fakultat Sosial-Ekonómiko di Universidat Nashonal di Antia na 1991 na momentu ku e tabata konsiderá otorgá Elis Juliana un doktorado di honor den koperashon ku Fakultat Hurídiko. Pa e trabou ei, E dies terenonan reveladó di Elis Juliana. Un inventarisashon di su diversidat kultural-sientífiko mi a entrevistá profeshonalnan di diferente disiplina di siensia i ramo di arte, manera historiadó/dokumentalista drs. Emy Maduro, antropólogo drs. Rose Mary Allen, etnomusikólogo drs. Eric Lacroes, skultor sra. May Henriquez †, arkeólogo dr. Jay Haviser, etnólogo rev. Paul Brenneker †, filósofo sr. Lloyd Narain i pintor sr. Luigi Pinedo. E dies terenonan ta deskribí Juliana komo:

1. antropólogo
2. dokumentalista
3. filósofo
4. edukadó
5. poeta/eskritor
6. etnomusikólogo
7. arkeólogo
8. deklamadó/presentadó
9. pintor
10. skultor