Elis Juliana
Curaçao Cultural Icon

Atenshon!

Un grandi di Kòrsou i Antia a bai sosegá. Elis Juliana, konosí komo Òmpi Elis pa un gran mayoria di nos pueblo a fayesé mardugá di 23 di yüni na edat di 85 aña. Elis a sa di yuda nos pone paso na manera sistemátiko pa nos subi seru di sabiduria i di para pa loke nos ta. Un palabra di konsuelo pa su famia i pa henter pueblo di e islanan ku a yega di forma Antia hulandes. Resientemente el a risibí un doktorado honorífiko di Universidat di Kòrsou pa e gran trabou ku el a hasi riba diferente tereno ku tin keber ku identidat, literatura, antropologia, arkeologia, arte gráfiko, i arte plástiko.


Juliana na trabou


Elis Juliana i su amigu dokumentalista Salomon Rubens
Elis Juliana ta un dokumentalista pasobra el a kolekshoná hopi dokumento, inkluyendo artefakto. Un dokumento ta kualke opheto ku ta kontené informashon. El a konsiderá e ophetonan akí material balioso i a deskribí nan di tal manera ku despues tabata posibel haña nan i nan informashon korespondiente bèk na un manera efikas. Sin preparashon komo tal, el a desplegá aktitut di un bèrdadero dokumentalista i diseñá su mes sistema di palabra klave ku ta hasi posibel buska na un manera organisá.

Juliana a mustra konsiensia i deskribí no solamente un aspekto di opheto, maske esaki tabata dominante. Tur aspekto spesífiko dje opheto e tabata deskribí, hasiendo e opheto mas asesibel i útil pa uzadónan. Difushon dje material ta e siguiente kriterio ku kua e dokumentalista akí a kumpli, manera e kantidat respetá di publikashon di dje ta ilustrá. Entre nan, e impreshonante kolekshon di potrèt di dje i Brenneker ku ta konsistí di míles di potrèt riba un gran variedat di tópiko. Dokumentashon ta masha importante pa trabou sientífiko. Ku e trabou akí Juliana a proba su mente sientífiko i krea pa otronan un base sólido di dato pa inbestigashon, garantisando material pa studia pa aña i generashonnan benidero.El a hasi trabou di banguardia i emansipashon, elevando material konsiderá sin importansha na nivel di inbestigashon sientífiko.